عشان تبقي محجبه روشه؟

علشان تبقى محجبة روشة طحن يا بت
يبقى تحطى صورة حلوة ليكى ع النت
تلبسى فيها بَدى كارينا تحت الكَت
اما الطرحة ديه طبقات
فوشيا ف لبنى على كاروهات
و الجزمة متكنش فلات
لجل تهز اللحمة الزايدة
و تخليكى سيكسى يا عايدة
كدة تيجى و بسرعة الفايدة
اما الجيبة ديه ممنوع
خليكى فى الجينز المقطوع
ابو رقعة و كام جيب منزوع
او شورت يكون كدة الوان
ماحنا فى صيف و فى حر كمان
يعنى الشورت تحته شراب يبقى جنان
و قوليلنا دة حجاب ع الموضة
و اصل الموضة علينا مفروضة
بس الشعر دة حاجة مرفوضة
يبقى ايدينا تتعرى ايه يعنى؟
و رجلينا لو بانت يعنى
مش مهم مش دة المعنىِ
الحجاب دة عشان الشعر
اللى يخللى صاحبنا يخر
يتنهد و يقول فينا شعر
لكن التحذيق و التلزيق عادى
و الصدر المتفسر عادى
و الوسط بيترقص عادى
يا خوانا المهم الشعر
هو دة اللى فيه السر
يتغطى و كل واحد حر
يعنى اقعدى ع النيل مع صاحبك
يمسك ايدك ينتش حاجبك
يلزق جنبك
مش مهم طب و ايه يعنى؟
تسرقى مننا فى الاوتوبيس
أو تخطفى مننا عريس
مش مهم طب و ايه يعنى؟
ياخوانا المهم الشعر
هو دة اللى فيه السر
تغتابى اختك تخنقى فيها
تقلبى حارة عاليها واطيها
مش مهم طب و ايه يعنى؟
تحسدى واحدة على نعمتها
يشيلوها ع الاسعاف فى ساعتها
مش مهم طب و ايه يعنى؟
حتى لو مبتركعيهاش
و القرآن عندك مالاقاش
لا صدى فى قلبك و لا فى لسانك
مش مهم ربنا يهدى
ياخوانا المهم الشعر
هو دة اللى فيه السر
راحت فين الحشمة يا ناس
فين اخلاق اولاد الناس
الموضوع مش طرحة و شعر
المفروض علينا الستر
ستر الجسم و ستر مفاتنه
ستر السمعه و ستر الدين
و نستر بعضنا يا حلوين
بس نقول و نعيد ل مين؟
و انتم يا بنات مش فاهمين
يللا خلينا تانى نقول
الموضوع مش موضوع شعر
الدين عمره ما كان فى الشعر
الدين ياخوانا فى عمايلنا
اللى بقت ديانتها الكُفر

ديوان جديد لأمل محمود